Roedd Graham Morris o Gwmafan bron yn
80 mlwydd oed pan benderfynodd ennill sgiliau ar gyfer yr 21ain Ganrif a
chofrestru ar gwrs learndirect mewn cyfrifiadura sylfaenol yn ei
lyfrgell leol.
Er iddo ymddeol dros 25 mlynedd yn ôl, roedd Graham yn benderfynol o ennill
sgiliau llythrennedd digidol hanfodol, a chadw mewn cysylltiad â’i 4 o
wyrion ac wyresau.
“Nid yw darllen yn ddigon i gadw’r meddwl yn weithgar. Mae angen heriau newydd ac mae’n rhaid dal ati i wthio eich hun,” esboniodd Graham.
Roedd hynny ddwy flynedd yn ôl, ac erbyn hyn mae Graham yn gallu mynd ar y rhyngrwyd ac e-bostio ffrindiau a theulu. Mae ganddo gyfrifiadur a’r rhyngrwyd yn ei gartref hyd yn oed!
“Mae fy wyrion yn gwybod llawer mwy na fi ond mae ymweld â nhw a siarad gyda nhw am beth maen nhw’n ei wneud ar y cyfrifiadur yn deimlad rhyfeddol. Mae’r dosbarthiadau hyn wedi fy ngalluogi i deimlo’n rhan o fywydau fy wyrion a dysgu am eu diddordebau”, esboniodd Graham.
Lleolir Llyfrgell Cwmafan, fel unrhyw lyfrgell leol arall, yng nghanol y gymuned ac mae’n galluogi unigolion i gymdeithasu â ffrindiau hen a newydd. Mae Graham yn dod i’r llyfrgell i ddysgu o leiaf unwaith yr wythnos yn ystod y sesiynau tiwtorial learndirect dan ofal Rosemary Royce, Rheolwr Partneriaeth learndirect, yn ogystal â defnyddio cyfrifiaduron y llyfrgell i astudio gyda chymorth staff y llyfrgell ar brydiau eraill.
