Roedd Liam McNamara o Ferthyr yn un
o’r cannoedd o drigolion lleol a ddioddefodd yn sgil y dirwasgiad a’r
effeithiau trychinebus a gafodd ar ddiwydiant gweithgynhyrchu’r ardal.
Er gwaethaf pob disgwyl, mae Liam, sy’n 41 oed, ar ei ffordd yn ôl i
waith drwy’r rhaglen gyflogadwyedd a gynigir gan gwmni gweithgynhyrchu
hynaf Merthyr, Sefydliad y Deillion Merthyr Tudful a’r darparwr dysgu
ar-lein learndirect.
Bu Liam yn gweithio ar y llinell gynhyrchu yn ffatri Hoover am 14 mlynedd. Roedd yn un o’r 337 o weithwyr a gollodd eu swyddi yn y ffatri yn gynharach eleni ac ar ôl bod yn chwilio am waith am 6 mis, mae nawr ar y ffordd i sicrhau swydd trwy raglen gyflogadwyedd newydd a gynigir gan SDMT, yn defnyddio deunydd dysgu Working Ways learndirect.
Mae Liam bellach ar lwybr newydd i gyflogaeth ar ôl cael ei gyfeirio o dan y Cynllun Cam at Waith gan ei Ganolfan Byd Gwaith lleol. Mae’n ennill sgiliau a phrofiad gwaith drwy ffatri Sefydliad y Deillion Merthyr Tudful (SDMT). Nid ffatri yn unig mo SDMT – mae hefyd yn cynnig gwasanaeth cyflogaeth, yn helpu aelodau o’r gymuned leol, waeth a oes ganddynt anabledd ai peidio, i ennill y sgiliau sydd eu hangen arnynt i ddychwelyd i weithio.
Mae Liam bellach wedi cwblhau ei gwrs cyflogadwyedd 8 wythnos ac meddai:
“Fe adewais yr ysgol heb fawr o gymwysterau a dim ond ar ôl tyfu’n oedolyn y sylweddolais fy mod i’n dyslecsig.
“Dwi’n gwybod fod yna lawer o bobl yn yr un sefyllfa â mi, ond dyw hynny
ddim yn gwneud pethau’n haws. Os byddwch chi yn yr un sefyllfa rhywbryd,
ceisiwch wneud y gorau o’r sefyllfa a manteisio ar y cyfleoedd sydd ar gael
i ennill sgiliau. Mae sgiliau TG yn arbennig o ddefnyddiol gan fod pob
cyflogwr yn gofyn am y rhain erbyn hyn”.
.
“Rwy’n lwcus bod fy ngwraig yn dal i weithio ond nid yw eraill yr un mor lwcus. Os yw hyn yn wir amdanoch chi, peidiwch ag oedi gan fod yna swyddi i’w cael, ond mae angen i chi wneud popeth o fewn eich gallu gan y bydd rhaid i chi gystadlu amdanynt.”
Os hoffech ragor o wybodaeth am y cwrs Working Ways cysylltwch â cymru@ufi.com.
