Lucy Owen, cyflwynydd BBC Wales Today, yn lansio ymgyrch ‘darllen gyda’ch gilydd, chwarae gyda’ch gilydd’ yn Llyfrgell Abertawe.
Bu Lucy a 10 o ddisgyblion Ysgol Gynradd Waun Wen yn dathlu lansio’r ymgyrch trwy fynd ar-lein a chwarae’r gêm ryngweithiol ‘Legula Adventure, sydd wedi’i datblygu gan learndirect i helpu rhieni i ymarfer eu sgiliau llythrennedd a rhifedd.
Nod yr ymgyrch yw helpu i godi ymwybyddiaeth o faterion llythrennedd a rhifedd ymysg rhieni trwy adeiladu ar fanteision dysgu gyda’u plant.
Mae’r gêm yn cyfuno posau sy’n seiliedig ar fathemateg a Saesneg ac mae’n llawn lliw, antur a chyffro fel unrhyw gêm ryngweithiol arall i blant.
Mae’r ymgyrch hefyd yn pwysleisio pa mor bwysig yw hi i rieni a phlant ddarllen gyda’i gilydd. Yn ystod yr ymweliad, bu Lucy’n darllen llyfr learndirect, “Where did the river go?”, a oedd yn boblogaidd iawn gyda’r plant. Mae’r llyfr yn cynnwys sawl her i helpu rhieni gyda’u sgiliau mathemateg a Saesneg, tra bod y plant yn mwynhau’r stori.
Meddai Lucy Owen, sy’n fam i Gabriel, 14 mis oed:
"Dwi wedi dod yma heddiw gan fy mod i’n credu ei bod hi’n bwysig rhoi sylw i lythrennedd oedolion a sut y gellir ei wella. Dwi’n cefnogi ymgyrch learndirect a’i manteision gant y cant a dwi’n gobeithio y bydd yn ddefnyddiol i lawer o oedolion."
Ychwanega Jeff Greenidge, Pennaeth learndirect yng Nghymru:
“Yn ôl astudiaethau diweddar, mae 26 miliwn o oedolion ledled y DU yn cael rhyw fath o anhawster gyda mathemateg neu Saesneg. Fodd bynnag, fel y dengys yr ymchwil, nid dim ond yn y gwaith y gall diffyg sgiliau fod yn rhwystr iddynt. Mae hefyd yn effeithio ar dasgau bob dydd fel helpu eu plant gyda’u gwaith cartref.
“Nod Legula Adventure yw annog rhieni i herio’u plant i fynd ar daith llawn hwyl i ddysgu pethau newydd – a gwella’u sgiliau mathemateg a Saesneg ar yr un pryd.”
I gael llyfr ‘Where Did The River Go?’ am ddim neu chwarae’r gêm ryngweithiol ‘Legula Adventure, ewch i www.wheredidtherivergo.co.uk.
