Mae Coleg Menai Caernarfon wedi lansio cwrs
iaith Saesneg newydd sbon wedi ei anelu at bobl nad yw Saesneg yn
iaith gyntaf iddynt.
Daeth y Gweinidog Treftadaeth, Alun Ffred Jones AC, i Goleg Menai
Caernarfon i gael blas ar y cwrs ELLIS sef system dysgu iaith ar-lein gan
learndirect.
Dywedodd Lynn Lording-Jones, sy’n rhedeg cyrsiau ESOL (Saesneg i Siaradwyr
Ieithoedd Eraill) yng Ngholeg Menai: “Rydym yn hynod o falch o allu cynnig
y cwrs yma yng Ngholeg Menai Caernarfon am y tro cyntaf. Bydd myfyrwyr sy’n
byw yn lleol nawr yn gallu galw i mewn i Goleg Menai Caernarfon ar amser
sy’n eu siwtio - yn ystod y dydd ar ddydd Mawrth ac ar nos Iau. Ar y cwrs,
mae myfyrwyr yn defnyddio cyfrifiaduron i ddysgu Saesneg - maent yn cael y
cyfle i recordio eu llais, ymarfer synau, gwylio clips fideo o sefyllfaoedd
pob dydd a dysgu ar gyflymdra sy’n eu siwtio.”
Sgwrsiodd un fyfyrwraig, Eva Chapela Orri, efo’r Gweinidog am beth roedd
hi’n ei hoffi am y cwrs ELLIS. Dywedodd Eva, sy’n 24 oed ac yn wreiddiol o
Sbaen: “Des i’r wlad yma i ddysgu Saesneg. Rwyf ar hyn o bryd yn astudio
cwrs ESOL llawn amser ac mae ELLIS yn fodiwl ar y cwrs. Dwi’n ffeindio’r
cwrs yn ddefnyddiol iawn gan ein bod yn cael gwrando ar bobl yn siarad yr
iaith - sy’n rhywbeth dwi’n ei ffeindio’n anodd i’w ddeall weithiau.”
Am fwy o wybodaeth ar gyrsiau ESOL neu ELLIS yng Ngholeg Menai ffoniwch
01248 383 347 neu e-bostiwch
esol@menai.ac.uk
